Maxkamad ku taalla caasimadda Suuriya ee Dimishiq ayaa dil ku xukuntay madaxweynihii hore ee dalkaasi, Bashaar Al-Asad, kadib markii lagu helay dambiyo la xiriira xadgudubyo ka dhacay intii uu hoggaaminayay dalka.
Xukunka ayaa maanta, 11-ka Agoosto 2026, lagu dhawaaqay iyadoo Bashaar Al-Asad lagu maxkamadeynayay maqane, maadaama uu dalka ka baxay kadib burburkii xukuumaddiisa dhammaadkii sanadkii 2024. Wararka ayaa sheegaya in Al-Asad uu haatan ku sugan yahay Ruushka.
Maxkamaddu waxay Al-Asad ku heshay dambiyo ay ka mid yihiin dilal qorsheysan, jirdil, xarig aan sharci ahayn iyo dambiyo ka dhan ah aadanaha, kuwaas oo lagu eedeeyay inay dhaceen intii uu socday dagaalkii sokeeye ee muddada dheer ka jiray Suuriya.
Sidoo kale, maxkamaddu waxay xukunka dilka ku riday walaalkiis Maher Al-Asad, halka Atef Najib, oo ahaa sarkaal sare oo ka tirsanaa hay’adaha amniga xilligii taliskii Al-Asad, isna lagu xukumay dil. Najib ayaa xabsiga ku jira, waxaana lagu eedeeyay inuu door ku lahaa howlgalladii amni ee ka dhacay Daraa sanadkii 2011.
Bashaar Al-Asad ayaa xilka madaxweynaha Suuriya hayay tan iyo sanadkii 2000, isagoo xukunka kala wareegay aabbihii, Xafiz Al-Asad. Xukunkiisa ayaa si weyn ugu suntanaa dagaalkii sokeeye ee dalka ka qarxay 2011, kaas oo sababay dhimasho baahsan, barakac iyo burbur xooggan.
Taliskii Al-Asad ayaa ugu dambeyn burburay bishii December 2024, waxaana madaxweynihii hore uu ka baxay Dimishiq, isagoo markii dambe gaaray Ruushka. Dowladda Suuriya ayaa tan iyo xilligaas waday dadaallo ku aaddan in mas’uuliyiintii hore lala xisaabtamo.
Xukunka maanta ayaa noqonaya xukunkii ugu horreeyay ee rasmi ah oo dil ah oo lagu rido Bashaar Al-Asad tan iyo markii uu taliskiisu dhacay, waxaana tallaabadan loo arkaa mid muhiim u ah geeddi-socodka cadaaladda iyo isla-xisaabtanka Suuriya.
