Diyaaradaha dagaalka Mareykanka, iyagoo kaashanaya Dowladda Federaalka Soomaaliya, ayaa duqeyn cirka ah ka fuliyay deegaanka Quumbi, oo ku yaalla qiyaastii 75 kiiloomitir waqooyi-galbeed magaalada Kismaayo.
Taliska Mareykanka ee Afrika AFRICOM ayaa sheegay in duqeynta lala beegsaday xubno ka tirsan Al-Shabaab, waxaana howlgalka la fuliyay 5-tii Sebtembar 2026. AFRICOM waxay sheegtay in duqeyntu ay dhacday iyadoo lala kaashanayo Dowladda Federaalka Soomaaliya iyo Ciidamada Qalabka Sida Soomaaliyeed.
AFRICOM ma aysan shaacin tirada khasaaraha ka dhashay duqeynta ama nooca diyaaradaha iyo hubka loo adeegsaday, iyadoo Taliska Mareykanka uu sheegay in faahfaahinta ciidamada iyo agabka loo adeegsaday aan la shaacin sababo la xiriira amniga howlgallada.
Duqeyntan ayaa qeyb ka ah howlgallada milatari ee Mareykanka iyo Dowladda Federaalka Soomaaliya ay ka wadaan dalka, kuwaas oo lagu bartilmaameedsanayo fariisimaha iyo xubnaha Al-Shabaab.
Deegaanka Quumbi ayaa horey u ahaa goob ay AFRICOM ka fulisay duqeymo kale oo ka dhan ah Al-Shabaab, taasoo muujineysa in aagga Koonfurta Soomaaliya uu weli yahay mid diiradda lagu saarayo howlgallada cirka.
Ilaa hadda ma jiro war rasmi ah oo madax-bannaan oo faahfaahinaya khasaaraha dhabta ah ee Al-Shabaab ka soo gaaray duqeynta ama haddii ay jiraan waxyeellooyin soo gaaray dadka rayidka ah.
AFRICOM ayaa sheegtay in ujeeddada howlgalladan ay tahay in la wiiqo awoodda Al-Shabaab ee ay ugu hanjabi karto ciidamada Mareykanka iyo muwaadiniintooda, iyadoo lala shaqeynayo ciidamada Soomaaliya.
