Madaxweynaha Mareykanka, Donald Trump, ayaa mar kale hadal ka keenay muranka muddada dheer ka dhex taagnaa Itoobiya iyo Masar ee ku saabsan Biyo-xireenka Weyn ee Dib-u-curashada Itoobiya (GERD), isagoo sheegay in biyo-xireenku uu saameyn ku yeeshay qulqulka biyaha Webiga Niil ee gaara Masar.
Trump ayaa soo jeediyay in dowladaha Addis Ababa iyo Qaahira ay wadahadallo ka yeeshaan xiisadda ka dhalatay biyo-xireenka, isaga oo sidoo kale muujiyay inuu diyaar u yahay inuu dhexdhexaadiyo labada dal si xal looga gaaro khilaafka.
Madaxweynaha Mareykanka ayaa sheegay in maamulkiisu uu caddeynayo sida uu, aragtidiisa, biyo-xireenku u saameeyay qulqulka biyaha Niil ee Masar, oo si weyn ugu tiirsan biyaha webigaas.
Trump ayaa hadalkiisa ku daray in haddii uu ahaan lahaa hoggaamiyaha Masar, isla markaana dalku wajihi lahaa xaalad biyo-yaraan ah, uu tallaabo milatari ka qaadi lahaa biyo-xireenka Itoobiya.
“Biyo-xireenka Itoobiya wuxuu xannibay biyaha Masar, wuxuuna dhibaato ku yahay qulqulka biyaha Niil. Haddii aan Masar ahaan lahaa, waan duqayn lahaa biyo-xireenkaas,” ayuu yiri Donald Trump.
Hadalka Trump ayaa kusoo beegmaya iyadoo Biyo-xireenka GERD uu sannado badan muran ka dhex abuurayay Itoobiya, Masar iyo Suudaan, kuwaas oo ay isku hayaan saameynta biyo-xireenku ku yeelan karo isticmaalka iyo qaybsiga biyaha Webiga Niil.
Itoobiya ayaa biyo-xireenka u aragta mashruuc istaraatiiji ah oo muhiim u ah korontada, horumarinta dhaqaalaha iyo baahida sii kordheysa ee tamarta dalka. Dhanka kale, Masar ayaa walaac ka muujisa in habka loo maareeyo biyaha biyo-xireenka uu saameyn ku yeesho helitaanka biyaha ay u baahan tahay.
Dowladda Itoobiya ayaa horay u diidday dadaallo dhexdhexaadin oo uu Mareykanku hormuud ka ahaa, iyadoo Washington ku eedeysay inay mowqifkeeda u janjeerisay dhinaca Masar. Khilaafkaas ayaa xilligaas sababay ismaandhaaf diblomaasiyadeed oo u dhexeeyay labada dowladood.
Soo jeedinta cusub ee Trump ee ku aaddan dhexdhexaadinta ayaa dib usoo nooleyn karta dadaallada lagu doonayo in xal diblomaasiyadeed looga gaaro muranka, inkastoo hadalladiisa ku saabsan duqeynta biyo-xireenka ay sare u qaadi karaan xiisadda siyaasadeed ee gobolka.
Ilaa hadda, xal waara oo ay dhammaan dhinacyadu ku heshiiyeen oo ku saabsan maamulka iyo isticmaalka biyaha Niil weli waa arrin xasaasi ah oo saameyn ku leh xiriirka Itoobiya, Masar iyo Suudaan.
