Taliyaha Ciidanka Xoogga Dalka Soomaaliyeed, Sareeye Guuto Ibraahim Maxamed Maxamuud, ayaa booqasho rasmi ah ku tagay magaalada Ankara ee caasimadda dalka Turkiga, halkaas oo uu kula kulmay mas’uuliyiin sare oo ka tirsan dowladda iyo ciidamada dalkaasi.
Taliyaha ayaa booqday Wasaaradda Gaashaandhigga Jamhuuriyadda Turkiga iyo Taliska Guud ee Ciidamada Turkiga, isagoo kulamo gaar ah la yeeshay Wasiirka Gaashaandhigga Turkiga, Yaşar Güler, iyo Taliyaha Guud ee Ciidamada Turkiga, Sareeye Guud Selçuk Bayraktaroğlu.
Kulamada labada dhinac ayaa diiradda lagu saaray xoojinta xiriirka iyo iskaashiga istiraatiijiga ah ee Soomaaliya iyo Turkiga, gaar ahaan dhinacyada difaaca, amniga, tababarka ciidamada iyo horumarinta awoodda Ciidanka Xoogga Dalka Soomaaliyeed.
Sidoo kale, waxaa laga wada hadlay sidii loo sii xoojin lahaa wada shaqeynta hay’adaha difaaca ee labada dal, iyo sidii taageerada Turkiga ee Soomaaliya loogu sii horumarin lahaa qaab wax ka tari kara dhismaha iyo tayeynta ciidamada Soomaaliyeed.
Turkiga ayaa muddooyinkii u dambeeyay door muuqda ku lahaa taageerada ciidamada Soomaaliya, iyadoo magaalada Muqdisho uu ku yaallo xarunta tababarka ciidamada Soomaaliyeed ee TURKSOM, oo lagu tababaro cutubyo ka tirsan Ciidanka Xoogga Dalka.
Booqashada Taliyaha Ciidanka XDS ee Ankara ayaa kusoo beegmaysa xilli Soomaaliya ay waddo dadaallo lagu xoojinayo awoodda ciidamada qaranka iyo dib-u-dhiska hay’adaha amniga, iyadoo iskaashiga Soomaaliya iyo Turkiguna uu noqday mid si gaar ah muhiim ugu ah dhinacyada difaaca iyo amniga.
Kulamadan ayaa sidoo kale muujinaya sii socoshada xiriirka dhow ee labada dowladood, iyadoo labada dhinac ay doonayaan in iskaashigooda difaac iyo amni loo sii qaado heerar ka sarreeya kuwii hore.
