Dowladda Federaalka Soomaaliya ayaa lagu wadaa inay dib u amarto furitaanka garoonka diyaaradaha ee magaalada Doolow, kaas oo muddo ku dhow laba sano u xirnaa sababo la xiriira khilaaf siyaasadeed iyo xiisado ka jiray gobolka Gedo.
Sida ay ilo xog-ogaal ah u xaqiijiyeen Warbaahinta, dowladda Federaalka ayaa maalmaha soo socda la filayaa inay qaaddo tallaabo rasmi ah oo lagu fasaxayo dib u furitaanka garoonka, kaddib dadaallo iyo wada-hadallo lagu doonayo in lagu xalliyo khilaafkii sababay xiritaankiisa.
Xogta la helayo ayaa sheegeysa in wada-hadal gaar ah uu dhexmaray maamulka degmada Doolow iyo Xafiiska Ra’iisul Wasaaraha Soomaaliya, kaas oo diiradda lagu saaray xaaladda garoonka iyo sidii dib loogu bilaabi lahaa howlihiisa.
Labada dhinac ayaa lagu soo warramayaa inay isku afgarteen in garoonka dib loo furo maalmaha soo socda, iyadoo Dowladda Federaalka Soomaaliya ay qaadi doonto tallaabada rasmiga ah ee lagu amrayo furitaankiisa.
Garoonka diyaaradaha ee Doolow ayaa muddo dheer muhiim u ahaa isu socodka dadka iyo gaadiidka cirka ee gobolka Gedo, waxaana xiritaankiisu saameyn ku yeeshay shacabka deegaanka iyo adeegyada duulimaadyada ee ka jiray magaalada.
Xiritaanka garoonka ayaa salka ku hayay xiisad siyaasadeed oo muddo ka taagnayd gobolka Gedo, taas oo qeyb ka ahayd khilaafka u dhexeeyay Dowladda Federaalka Soomaaliya iyo maamulka Jubaland.
Khilaafkaasi ayaa saameyn ku yeeshay arrimo badan oo la xiriira maamulka iyo amniga gobolka, iyadoo degmada Doolow ay ka mid noqotay goobaha uu sida tooska ah u saameeyay loollanka siyaasadeed ee u dhexeeyay dowladda dhexe iyo Jubaland.
Dib u furista garoonka ayaa noqon karta tallaabo muhiim ah oo lagu yareynayo culeyska ka dhashay xiritaankiisa, isla markaana dib loogu soo celinayo adeegyada duulimaadyada iyo isku socodka gobolka.
Waxaa sidoo kale la filayaa in furitaanka garoonku uu fududeeyo safarrada dadka ku nool gobolka Gedo iyo deegaannada kale ee dalka, iyadoo shirkadaha diyaaradaha ay heli doonaan fursad ay dib ugu bilaabaan duulimaadyadii garoonka.
Si kastaba ha ahaatee, tallaabada rasmiga ah ee lagu furayo Garoonka Diyaaradaha Doolow ayaa la filayaa inay soo baxdo maalmaha soo socda, iyadoo arrintan loo arko qeyb ka mid ah dadaallada lagu dejinayo xiisadaha siyaasadeed ee ka jiray gobolka Gedo.
