Ciidanka Ilaalada Kacaanka Islaamiga ah ee Iran (IRGC) ayaa sheegay in markab xamuul oo ay ku tilmaameen inuu jebiyay habraacyada marinka uu miino badeed kula qarxay Marinka Hormuz, kaddib markii uu isku dayay inuu halkaas maro isaga oo aan fasax haysan.
Sida lagu sheegay bayaan ka soo baxay Waaxda Xiriirka Dadweynaha ee IRGC, markabka ayaa la sheegay inuu isku dayayay inuu si aan fasax ahayn uga gudbo Marinka Hormuz, taas oo keentay inuu ku dhaco miino badeed.
Ciidamada Iran ayaa intaas ku daray in markabka uu dab qabsaday kaddib qaraxa, iyadoo la sheegay in dhacdadu ay dhacday saaka.
War-saxaafadeedka IRGC ayaa lagu sheegay in markabka xamuulka ah, oo siday in ka badan 2,500 oo konteenar, uu ku degay biyaha koonfureed ee Marinka Hormuz kaddib markii uu dab xooggan qabsaday.
Hase yeeshee, faahfaahin dheeraad ah oo ku saabsan magaca markabka, calanka uu ka babanayay, halka uu ka yimid iyo halka uu ku sii jeeday ayaan lagu sheegin xogta la shaaciyay.
Ilaa hadda, lama hayo xog madax-bannaan oo xaqiijinaysa faahfaahinta dhacdada, waxaana sidoo kale aan la ogeyn xaaladda shaqaalihii saarnaa markabka, tiradooda iyo in ay jiraan dad ku dhintay ama ku dhaawacmay qaraxa.
Hay’adaha kale ee la socda amniga iyo isu-socodka maraakiibta ee Marinka Hormuz ayaan weli soo saarin warbixin si madax-bannaan u xaqiijinaysa dhacdadan, sida ku cad xogta la hayo.
Marinka Hormuz ayaa ka mid ah marin-biyoodka ugu muhiimsan caalamka, maadaama uu laf-dhabar u yahay isu-socodka shidaalka iyo badeecadaha kale ee isaga kala goosha dalalka Khaliijka iyo suuqyada caalamka.
Haddii dhacdadan la xaqiijiyo, waxay sare u qaadi kartaa walaaca laga qabo amniga maraakiibta ganacsiga ee isticmaala marin-biyoodkan istaraatiijiga ah.
