Dowladda Itoobiya ayaa ka falcelisay mowqifka Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ee ku aaddan bayaankii kasoo baxay shirkii madaxda Soomaaliya, Masar, Ereteriya iyo Suudaan ee 4-tii Oktoobar lagu qabtay magaalada New Al-Calamayn ee dalka Masar.
Shirka afarta dal ayaa looga hadlay xaaladda amni iyo siyaasadeed ee Geeska Afrika iyo Badda Cas, iyadoo madaxdu ay sidoo kale adkeeyeen muhiimadda ay leedahay dhowrista madax-bannaanida iyo midnimada dhuleed ee dalalka gobolka, xallinta khilaafaadka si nabad ah iyo iskaashiga dhinacyada amniga iyo dhaqaalaha.
Bayaanka wadajirka ah ee kasoo baxay shirka ayaa si gaar ah loogu soo qaaday arrinta webiyada xuduudaha ka gudba, gaar ahaan Webiga Nile, iyadoo afarta dal ay ku baaqeen in la dhowro sharciga caalamiga ah, mabda’a ah in aan waxyeello loo geysan dalalka kale, iyo in tallaabooyinka la xiriira isticmaalka biyaha lagu saleeyo wargelin horudhac ah, wadatashi iyo isku-raac. Waxa kale oo bayaanku diiday tallaabooyin hal dhinac ah oo waxyeello u geysan kara isticmaalka biyaha ee dalalka ku yaalla qaybta hoose ee Webiga Nile.
Mowqifkaasi ayaa dhaliyey falcelin ka timid Itoobiya, iyadoo warbaahinta rasmiga ah ee dalkaasi ay si adag u dhaliishay taageerada Soomaaliya ee bayaanka Al-Calamayn. Warbixinta Itoobiya ayaa ku doodday in mowqifka Madaxweyne Xasan Sheekh uu saamayn ku yeelan karo danaha istiraatiijiga ah ee Itoobiya, gaar ahaan arrimaha la xiriira isticmaalka biyaha Nile iyo doorka Itoobiya ee gobolka.
Itoobiya iyo Masar ayaa muddo dheer isku khilaafsanaa maamulka iyo isticmaalka biyaha Nile, gaar ahaan Biyo-xireenka Weyn ee Itoobiya (GERD), iyadoo Masar iyo Suudaan ay walaac ka muujiyeen saameynta uu biyo-xireenku ku yeelan karo isticmaalka biyaha ee dalalka hoose, halka Itoobiya ay ku adkeysato in mashruucu muhiim u yahay horumarinta iyo korontada dalka.
Warbixinta Itoobiya ayaa sidoo kale soo hadal qaaday xiriirka labada dal, iyadoo xustay kaalintii Itoobiya ee arrimaha Soomaaliya iyo taageerada ay ciidamadeedu siiyeen dadaallada amniga iyo la-dagaallanka Al-Shabaab.
Dhinaca kale, warbixinta ayaa tilmaamtay in isbeddellada ka socda gobolka iyo mowqifyada cusub ee dowladaha Geeska Afrika ay saameyn ku yeelan karaan xiriirrada siyaasadeed iyo kuwa amni ee u dhexeeya dalalka gobolka.
Shirka Al-Calamayn ayaa kusoo aadaya xilli ay sii kordhayaan isbeddellada siyaasadeed iyo amni ee ka jira Geeska Afrika iyo Badda Cas. Madaxda Soomaaliya, Masar, Ereteriya iyo Suudaan waxay ku heshiiyeen in la xoojiyo wadatashiga iyo isku-duwidda arrimaha gobolka, waxaana sidoo kale la isla qaatay in la sameeyo hannaan joogto ah oo lagu dabagalo natiijooyinka shirka.
Dhanka kale, arrinta helitaanka marin-badeedka Itoobiya ayaa muddooyinkii dambe noqotay qayb muhiim ah oo ka mid ah siyaasadda dibadda ee Addis Ababa. Itoobiya oo aan lahayn xeeb ayaa si joogto ah u muujisay muhiimadda ay u leedahay helitaanka marin ganacsi oo badeed, arrintaas oo xiriir la leh doodaha ka socda gobolka ee ku saabsan amniga Badda Cas iyo isku-xirka dhaqaale ee Geeska Afrika.
Shirka Al-Calamayn ayaa sidoo kale carrabka ku adkeeyey muhiimadda amniga Badda Cas iyo xorriyadda isu-socodka maraakiibta ee Gacanka Cadmeed iyo marin-biyoodka Bab Al-Mandab.
Falcelinta Itoobiya iyo bayaanka afarta dal ayaa sidaas darteed kusoo beegmaya xilli ay gobolka ka jiraan khilaafaad is-dulsaaran oo la xiriira biyaha Nile, amniga Badda Cas, marin-badeedka iyo xiriirrada istiraatiijiga ah ee dalalka Geeska Afrika.
