Muqdisho: Xubnaha Guddiga Fulinta ee Xisbiga Cadaaladda iyo Sinnaanta (JSP) ayaa berri oo ku beegan 4:00 galabnimo loogu yeeray Xarunta Dhexe ee Xisbiga, halkaas oo lagu qabanayo xaflad rasmi ah oo lagu guddoonsiinayo ticket-ka musharraxa Madaxweynaha Hirshabelle, Cali Guudlaawe.
Xafladda ayaa la filayaa inay noqoto munaasabad si rasmi ah loogu muujinayo taageerada Xisbiga JSP ee Cali Guudlaawe, iyadoo xubnaha Guddiga Fulinta iyo mas’uuliyiin kale oo ka tirsan Xisbiga lagu wargeliyay inay ka qeyb galaan.
Tallaabadan ayaa ku soo beegmaysa xilli uu Hirshabelle ka jiro loollan siyaasadeed oo xooggan, iyadoo ay soo baxayaan doodo iyo dhaliilo la xiriira habka loo wajahayo xulashada musharraxa hoggaanka maamulka.
Qaar ka mid ah siyaasiyiinta iyo waxgaradka beesha Xawaadle ayaa la sheegay inay walaac ka muujiyeen musharraxnimada Cali Guudlaawe, iyagoo qaba in hoggaanka Hirshabelle uu noqdo qof si dhow uga tirsan deegaanka, isla markaana haysta taageero bulsho iyo mid siyaasadeed oo gudaha ah.
Mowqifkan haddii uu sii xoogeysto ayaa laga cabsi qabaa inuu sii adkeeyo loollanka siyaasadeed ee Hirshabelle, maadaama beesha Xawaadle ay ka mid tahay beelaha waaweyn ee ku nool maamulka, gaar ahaan gobolka Hiiraan, halkaas oo taageerada bulshada ay muhiim u tahay geeddi-socodka doorashada hoggaanka.
Dhanka kale, dhinacyo kale ayaa qaba in doorashada Madaxweynaha Hirshabelle ay u baahan tahay hannaan siyaasadeed oo furan oo loo siman yahay, kaas oo dhammaan musharraxiinta iyo dhinacyada siyaasadeed ay helaan fursad ay ku tartamaan, halkii go’aanka lagu saleeyn lahaa taageerada xisbi ama koox siyaasadeed oo gaar ah.
Cali Guudlaawe ayaa horey u soo noqday Madaxweynaha Hirshabelle, waxaana tallaabada JSP ee ku aaddan guddoonsiinta ticket-ka musharraxnimadiisa ay dib u soo celinaysaa doodda ku saabsan cidda hoggaamin doonta Hirshabelle xilliga soo socda.
Xafladda berri lagu qabanayo Xarunta Dhexe ee JSP ayaa sidaas darteed noqonaysa munaasabad siyaasadeed oo si weyn loo hadal hayo, iyadoo indhaha lagu hayo hadallada hoggaanka Xisbiga iyo jawaabta laga bixin doono doodaha iyo dhaliilaha ka taagan musharraxnimada Cali Guudlaawe.
