Ra’iisul Wasaaraha Xukuumadda Jamhuuriyadda Federaalka Soomaaliya, Xamsa Cabdi Barre, oo ku sugan dalka aan walaalanaha nahay ee Qatar, ayaa halka uu ka deganyahay magaalada Doxa, ku qaabilay Ra’iisul Wasaare Ku-xigeenka Qatar, ahna Wasiirka Difaaca, Mudane Sheekh Sucuud Bin Cabdiraxmaan Bin Xasan Al Taani.
Kulanka, oo qayb ka ahaa kulamadii rasmiga ahaa ee uu Ra’iisul Wasaaruhu la qaadanayay madaxda ugu sarreysa dalka Qatar, ayaa looga wada hadlay xoojinta iskaashiga labada dal ee dhinacyada amniga, difaaca iyo xasilloonida gobolka iyo dunida, gaar ahaan sidii si wadajir ah looga hortagi lahaa khataraha ka dhasha argagixisada xuduudaha ka tallaabta, kuwaas oo halis weyn ku haya Soomaaliya.
Ra’iisul Wasaare Xamsa ayaa Mudane Sheekh Sucuud uga warbixiyay guulaha laga soo hoyiyay xasillinta amniga magaalooyinka waaweyn iyo hawlgallada lagu qaaday kooxaha Khawaarijta.
Dhankiisa, Ra’iisul Wasaare Ku-xigeenka Qatar, Mudane Sheekh Sucuud Bin Cabdiraxmaan Bin Xasan Al Taani oo ugu yimid hoyga uu Dooxa ka degenyahay Ra’iisul Wasaaraha Soomaaliya , ayaa sheegay in Dowladda Qatar ay garab taagan tahay Soomaaliya, ayna diyaar u tahay in la sii ballaariyo iskaashiga labada dal ee dhinacyada kala duwan.
Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre, ayaa Ra’iisul Wasaare Ku-xigeenka Qatar uga mahadceliyay qaabilaadda diirran ee isaga iyo wafdigiisa, iyo heerka sare ee uu gaaray xiriirka labada dal. Waxa uu si gaar ah uga mahadceliyay sida ay Dowladda Qatar u garab istaagtay qaranimada Soomaaliya xilliyadii dalka lagu soo xadgudbay.
