Ciidanka Booliska Puntland, gaar ahaan Taliska Qaybta Gobolka Karkaar, ayaa magaalada Qardho ku qabtay Maymuun Sharmaake Nuur iyo Mulki Sharmaake Nuur, kuwaas oo loo haysto eedeymo la xiriira jirdil iyo tacaddi loo geystay gabar yar.
Muuqaal laga helay dhacdada ayaa muujinaya gabar yar oo loo geysanayo fal jirdil ah, iyadoo dhacdada la duubayay. Arrintan ayaa dhalisay walaac iyo caro ka dhex dhalatay bulshada, iyadoo dalabyo loo jeedinayo hay’adaha amniga iyo garsoorka in si dhab ah loo baaro dhacdada.
Ciidanka Booliska Puntland ayaa sheegay inay si degdeg ah uga hawlgaleen dhacdada, ayna gacanta ku dhigeen labada qof ee loo haysto kiiska.
Eedeysanayaasha ayaa la filayaa in loo gudbiyo hay’adaha garsoorka ee ay khuseyso, si baaritaan iyo tallaabo sharci ah looga qaado, iyadoo baaritaanka dhacdadu uu weli socdo.
Booliska ayaa sidoo kale bulshada ugu baaqaya inay la shaqeeyaan hay’adaha amniga, isla markaana wixii dhacdooyin noocan ah lagu soo wargeliyo hay’adaha ku shaqada leh, si loo ilaaliyo badqabka carruurta iyo dadka nugul.
