14-ka Bisha oo ku beegan maalin Jimce ah, waxaa la filayaa in magaalada Muqdisho ay soo gaaraan madaxweynayaasha Puntland iyo Jubaland, Saciid Cabdullaahi Dani iyo Axmed Maxamed Islaam Axmed Madoobe, kuwaas oo ka qeyb galaya shirka 15-ka Bisha la qorsheeyay inuu Muqdisho uga furmo Dowladda Federaalka iyo dhinacyada mucaaradka.
Shirka ayaa la sheegay inuu ka dhacayo xarunta Xalane, waxaana garwadeen ka ah Beesha Caalamka. Waxaa miiska wada-hadallada la filayaa in lagu soo qaado xaaladda siyaasadeed ee dalka, khilaafaadka u dhexeeya Dowladda Federaalka iyo dhinacyada mucaaradka, arrimaha doorashooyinka, xiriirka Dowladda Federaalka iyo dowlad goboleedyada, iyo sidii loo heli lahaa hannaan wada-hadal oo lagu gaari karo is-afgarad siyaasadeed.
Saciid Cabdullaahi Dani ayaa horey uga cudurdaartey ka qeybgalka shirka, hase yeeshee xogaha laga helayo dhinacyada ku dhow qabanqaabada shirka ayaa sheegaya in Beesha Caalamku ay dadaallo xooggan ku bixisay sidii Madaxweynaha Puntland uu uga soo qeyb geli lahaa.
Dani ayaa la sheegay inuu Beesha Caalamka u sheegay in Puntland ay ku jirto xaalad amni oo xasaasi ah, isla markaana ciidamo uu ku tilmaamay haraadigii ciidamadii Xasan Sheekh ay isku dayayeen inay amni darro ka abuuraan deegaano ka tirsan Puntland. Arrintan ayaa la sheegay inay kamid ahayd sababihii uu Dani u daliishaday inuu diiradda saaro xaaladda amni ee Puntland.
Si kastaba ha ahaatee, xogaha la helayo ayaa tilmaamaya in dadaallo iyo cadaadis diblomaasiyadeed oo ay Beesha Caalamku sameeyeen kadib, Saciid Dani uu ogolaaday inuu yimaado Muqdisho, si uu uga qeyb noqdo wada-hadallada siyaasadeed ee la qorsheeyay 15-ka Bisha.
Imaanshaha Axmed Madoobe iyo Saciid Dani ayaa shirka siin kara miisaan siyaasadeed oo dheeraad ah, maadaama labada hoggaamiye ay door muuqda ku leeyihiin siyaasadda mucaaradka iyo doodaha ka taagan hannaanka siyaasadeed ee dalka.
Waxaa sidoo kale la filayaa in dhinacyada shirka ka qeyb galaya ay si gaar ah uga hadlaan arrimaha doorashooyinka, habka loo maamulayo doorashooyinka soo socda, awood-qeybsiga siyaasadeed, xiriirka Dowladda Federaalka iyo dowlad goboleedyada, iyo sidii loo yareyn lahaa khilaafaadka siyaasadeed ee sii xoogeysanaya.
Arrintan ayaa ku soo beegmeysa xilli Dowladda Federaalka ay doorashooyin ka qabatay deegaano ka tirsan dalka, iyadoo sidoo kale ay jiraan qorshayaal la sheegay in doorashooyin kale looga qabanayo deegaano dheeraad ah.
Dadka siyaasadda odorasa ayaa aaminsan in khilaafka ugu weyn uu salka ku hayo hannaanka awoodda iyo maamulka doorashooyinka, iyadoo Dowladda Federaalka lagu eedeeyo inay saameyn xooggan ku leedahay qaar kamid ah dowlad goboleedyada, gaar ahaan Koonfur Galbeed, Galmudug iyo Hirshabelle.
Sidoo kale, dhinacyada mucaaradka ayaa si joogto ah uga digaya in Dowladda Federaalka ay isku dayeyso inay si gaar ah u maamusho geeddi-socodka doorashooyinka iyo hannaanka siyaasadeed ee dowlad goboleedyada, halka Dowladda Federaalka ay ku adkeysaneyso in tallaabooyinka ay qaaday ay qeyb ka yihiin qorshaha lagu horumarinayo nidaamka doorashooyinka iyo dowladnimada dalka.
Shirka Xalane ayaa sidaas darteed noqon kara kulan xasaasi ah oo lagu kala ogaan doono mowqifyada dhinacyada siyaasadda, iyadoo indhaha lagu hayo haddii ay dhinacyadu gaari karaan heshiis ku saabsan doorashooyinka iyo xiriirka Dowladda Federaalka iyo dowlad goboleedyada, ama haddii khilaafka siyaasadeed uu sii xoogeysan doono.
