Laba haween oo Soomaali ah ayaa lagu xiray magaalada Nairobi ee dalka Kenya, kaddib markii lagu eedeeyay inay isku dayeen inay si sharci-darro ah uga dhoofiyaan dahab miisaankiisu gaarayay 658 garaam.
Haweenka oo lagu kala magacaabo Shukri Cabdullaahi Maxamed iyo Farxiya Xuseen Sabriye ayaa la qabtay Jimcihii, xilli ay ku sugnaayeen Garoonka Caalamiga ah ee Jomo Kenyatta ee magaalada Nairobi.
Sida ay sheegtay dowladda Kenya, labada haween ayaa la tuhunsan yahay inay damacsanaayeen inay dahabka dalka uga dhoofiyaan diyaarad ay leedahay shirkadda Emirates, taas oo ku wajahneyd magaalada Dubai ee Isu-tagga Imaaraadka Carabta.
Ilaa hadda lama shaacin haddii Dubai ay ahayd halka ugu dambeysa ee ay u socdeen haweenka ama ay qorsheynayeen inay halkaas uga sii gudbaan dal kale. Sidoo kale, ma jiraan faahfaahin rasmi ah oo laga bixiyay halka dahabka loo waday iyo cidda loogu talagalay.
Waaxda Dambiyada Kenya ayaa haweenka gacanta ku dhigtay kaddib markii lagu tuhmay inay isku dayayeen inay dahabka dalka uga saaraan qaab aan waafaqsanayn shuruucda iyo nidaamka dhoofinta dahabka ee Kenya.
Dhacdadan ayaa kusoo beegmaysa xilli dalalka Bariga Afrika iyo qaar ka mid ah waddamada Aasiya ay si joogto ah ula tacaalayaan kiisaska la xiriira dhoofinta iyo tahriibinta dahabka ee sharci-darrada ah.
Hindiya ayaa horey u qabatay shaqsiyaad Soomaali ah oo lagu eedeeyay inay dahab si sharci-darro ah ku geliyeen dalkaas, iyadoo qaar ka mid ah dadkaasi ay haysteen dukumentiyo ama sharciyo ay ka heleen Kenya. Kiisaskaas ayaa markii dambe loo gudbiyay maxkamadaha Hindiya.
Kiiska labada haween ee lagu qabtay Nairobi ayaa hadda kusoo biiraya dhacdooyinka la xiriira dhaqdhaqaaqa dahabka ee gobolka iyo eedeymaha ku saabsan dhoofinta dahabka ee aan loo marin habraacyada sharciga ah.
Si kastaba, eedeymaha loo jeediyay labada haween ayaa weli ah kuwo baaritaan ku jira, waxaana go’aanka kama dambaysta ah laga sugayaa hay’adaha iyo maxkamadaha ay khuseyso.
