Galmudug oo laga Diiwaangeliyay InGuddiga Madaxa-bannaan ee Doorashooyinka Qaranka iyo Soohdimaha (GMDQS) ayaa si rasmi ah u shaaciyay natiijada diiwaangelinta codbixiyeyaasha laga sameeyay 11 degmo oo ka tirsan Dowlad-goboleedka Galmudug, iyadoo guddigu sheegay in hannaanka diiwaangelinta loo maray sharciga doorashooyinka qaranka iyo habraacyada u degsan guddiga.
Xogta la soo bandhigay ayaa muujineysa tirada dadka iska diiwaangeliyay degmo kasta iyo deegaannada hoos yimaada, iyadoo ay muuqato kala duwanaansho dhinaca tirada codbixiyeyaasha ah oo u dhexeeya degmooyinka.
Degmada Gaalkacyo ayaa noqotay degmada ugu badan ee codbixiyeyaashu iska diiwaangeliyeen, waxaana laga diiwaangeliyay 65,950 qof. Waxaa ku xigta degmada Cadaado, oo tirada dadka iska diiwaangeliyay ay gaartay 48,358 qof.
Degmada Hobyo waxaa laga diiwaangeliyay 37,734 codbixiye, halka Caabudwaaq ay iska diiwaangeliyeen 33,679 qof. Sidoo kale, Dhuusamareeb, oo ah xarunta Dowlad-goboleedka Galmudug, waxaa laga diiwaangeliyay 23,735 codbixiye, halka degmada Guriceel laga diiwaangeliyay 22,011 qof.
Xogta guddiga ayaa sidoo kale muujineysa in degmada Xarardheere laga diiwaangeliyay 9,929 codbixiye, Ceelbuur laga diiwaangeliyay 8,872 qof, halka Balanbale ay iska diiwaangeliyeen 7,349 codbixiye. Degmada Xeraale waxaa laga diiwaangeliyay 4,368 qof.
Natiijooyinka la shaaciyay ayaa qayb ka ah geeddi-socodka loogu diyaar-garoobayo doorashooyinka Galmudug, waxaana diiwaangelinta codbixiyeyaashu muhiim u tahay xaqiijinta dadka xaqa u leh inay codkooda dhiibtaan marka la gaaro maalinta doorashada.
Guddiga Madaxa-bannaan ee Doorashooyinka Qaranka iyo Soohdimaha ayaa sheegay in diiwaangelintu ay waafaqsan tahay Sharciga Doorashooyinka Qaranka iyo habraacyada guddiga, isla markaana laga fuliyay degmooyinka, tuulooyinka iyo deegaannada hoos yimaada ee loo asteeyay diiwaangelinta.
Shaacinta tirada codbixiyeyaasha ayaa sidoo kale sawir ka bixinaysa heerka ka qaybgalka bulshada ee degmooyinka kala duwan, iyadoo Gaalkacyo, Cadaado, Hobyo iyo Caabudwaaq ay hormuud ka yihiin goobaha laga diiwaangeliyay tirada ugu badan.
Tallaabadan ayaa imaanaysa iyadoo Galmudug ay galayso marxalado muhiim ah oo la xiriira diyaar-garowga doorashooyinka, waxaana la filayaa in guddigu sii wado shaacinta habraacyada iyo jadwalka marxaladaha xiga ee doorashada. ka badan 260 Kun oo Codbixiye.
