Dowladda Jubaland ayaa si adag u cambaareysay duqeyn dhinaca cirka ah oo ay sheegtay in xalay diyaarado militari oo Turki ah ka fuliyeen degmada Doolow ee gobolka Gedo.
War-saxaafadeed ay soo saartay Wasaaradda Warfaafinta, Dhaqanka iyo Dalxiiska Jubaland ayaa lagu sheegay in weerarku si toos ah u beegsaday guriga uu deggenaa Mahad Cabdiraxmaan Aadan, oo ahaa Taliyihii hore ee Ciidanka Asluubta Dowladda Federaalka Soomaaliya.
Jubaland ayaa sheegtay in Mahad Cabdiraxmaan Aadan loo bartilmaameedsaday sababo la xiriira aragtiyihiisa siyaasadeed ee ka duwan kuwa Madaxweynaha xilka ka sii degaya, iyadoo xustay in intii uu weerarku socday la riday laba gantaal, mid ka mid ahna uu ku dhacay guriga Guddoomiyaha degmada Doolow ee gobolka Gedo.
Sida lagu sheegay war-saxaafadeedka, weerarka ayaa dhaawac soo gaarsiiyay Mahad Cabdiraxmaan Aadan iyo afar qof oo rayid ah.
Dowladda Jubaland ayaa sheegtay in degmada Doolow ay muddo ka badan toban sano si weyn uga fogeyd dhacdooyin amni oo culus, ayna cambaareynayso in weerar habeenimo oo gantaallo loo adeegsaday uu waxyeello u geysto shacabka rayidka ah.
Jubaland waxay sidoo kale ku eedeysay Madaxweynaha xilka ka sii degaya iyo Dowladda Turkiga inay mas’uuliyad ka qaataan dhacdada, iyadoo sheegtay in awoodda militari ee Turkiga loo adeegsaday beegsiga shaqsiyaad qaba aragtiyo siyaasadeed oo ka duwan kuwa dowladda.
War-saxaafadeedka ayaa intaas ku daraya in dhacdadani ay muujinayso, sida ay Jubaland qabto, jihada khatarta ah ee ay dalka ku wajahayaan tallaabooyinka siyaasadeed iyo amni ee noocan ah, iyadoo ka digtay cawaaqibka ka dhalan kara iyo tusaalaha ay u noqon karto dhacdooyinka mustaqbalka.
Jubaland ayaa ugu baaqday Qaramada Midoobay, Midowga Afrika, IGAD, Mareykanka iyo Midowga Yurub inay si dhab ah u eegaan waxa ay ku tilmaantay ku lug lahaanshaha aan horay loo arag ee Turkiga ee dhacdadan, iyadoo sheegtay in arrintani aysan dan u ahayn shacabka Soomaaliyeed iyo xasilloonida gobolka.
Sidoo kale, Jubaland waxay Qaramada Midoobay ugu baaqday inay dib u eegto go’aanka lagu qaaday cunaqabateynta hubka ee Soomaaliya, ilaa laga helayo dowlad mas’uul ah iyo hannaan lagu xaqiijinayo in hubka Soomaaliya la siiyo uu yeesho xakameyn, maamul iyo isla-xisaabtan sax ah.
Ugu dambeyn, Jubaland waxay sheegtay in tallaabadan ay dhaawici karto kaalinta Turkiga ee dhex-dhexaadinta iyo xal u helidda khilaafaadka siyaasadeed ee Soomaaliya, iyadoo ku doodday in ficillada noocan ah ay adkeyn karaan dadaallada lagu isu keenayo dhinacyada Soomaalida ee aragtiyada siyaasadeed ku kala duwan.
