Madaxweynaha Soomaaliya, Xasan Sheekh Maxamuud, ayaa sheegay in dagaalka ka dhanka ah Al-Shabaab uu sii socon karo muddo kale, balse uu meesha ka saaray suurtagalnimada in kooxdaasi mar kale dib ula wareegto gacan-ku-haynta guud ee dalka.
Madaxweynaha oo wareysi siiyay warbaahinta Al Jazeera, ayaa sheegay in xaaladda amni ee Soomaaliya ay si weyn isu beddeshay marka loo eego xilliyadii hore, xilli uu tilmaamay in Al-Shabaab ay mar awood weyn ku lahayd qaybo badan oo dalka ah.
Xasan Sheekh ayaa sheegay in kooxda ay xilliyo hore awood u lahayd inay weerarro ka fuliso meelaha ku dhow xarumaha dowladda, oo ay ku jirto Madaxtooyada Soomaaliya, halka maanta uu sheegay inay boqolaal kiiloomitir u jirto caasimadda.
“Dagaalkani waxaa laga yaabaa inuu sii socdo muddo yar oo dheeraad ah, laakiin ma jirto wax suurtagal ah oo Al-Shabaab ay mar kale dalka oo dhan kula wareegi karto,” ayuu yiri Madaxweynaha.
Madaxweynaha ayaa sidoo kale sheegay in ciidamada dowladda iyo kuwa taageeraya ay horumar ka sameeyeen howlgallada ka dhanka ah Al-Shabaab, isagoo xusay in xaaladda maanta aysan la mid ahayn xilligii ay kooxdu gacanta ku haysay dhul ballaaran oo Soomaaliya ka tirsan.
Dhanka kale, Xasan Sheekh ayaa meesha ka saaray suurtagalnimada in Soomaaliya ay dib ugu laabato dagaallo sokeeye, kuwo beeleed ama isku dhacyo siyaasadeed.
“Al-Shabaab inay soo laabato waa wax aan suurtagal ahayn, sidoo kalena suurtagal ma aha in dalku dib ugu laabto dagaal sokeeye, dagaal beeleed ama dagaal siyaasadeed,” ayuu yiri Madaxweynaha.
Hadallada Madaxweynaha ayaa kusoo beegmaya xilli siyaasadda Soomaaliya ay ka taagan yihiin khilaafaadyo u dhexeeya dowladda Federaalka iyo qaar ka mid ah siyaasiyiinta mucaaradka iyo dowlad-goboleedyada.
Qaar ka mid ah siyaasiyiinta mucaaradka ayaa qaba in haddii Soomaalidu ay ku guuldarreysato inay xal siyaasadeed ka gaarto khilaafaadkooda, ay taasi fursad siin karto Al-Shabaab inay ka faa’iideysato kala qaybsanaanta gudaha.
Mucaaradku waxay sidoo kale ka digayaan in sii dheeraanshaha khilaafaadka siyaasadeed uu hoos u dhigi karo taageerada caalamka ee Soomaaliya, xilli dalka uu in ka badan saddex iyo toban sano la tacaalayay dagaalka Al-Shabaab iyo dadaallada lagu xoojinayo hay’adaha dowladda iyo amniga.
Hadalka Madaxweynaha ayaa sidaas kusoo beegmaya iyadoo dowladda Federaalka ay xoogga saarayso dagaalka ka dhanka ah Al-Shabaab, halka dhinacyada siyaasadda ay weli isku khilaafsan yihiin jihada dalka iyo qaabka loo wajahayo arrimaha amniga iyo siyaasadda.
