Safiirka Dowladda Itoobiya u qaabilsan Soomaaliya, Danjire Suleymaan Dedefo Woshe, ayaa bilaabay sagootintiisa Soomaaliya, kaddib markii uu soo dhammaaday muddadii uu xilka diblomaasiyadeed ku joogay dalka.
Danjire Suleymaan ayaa booqasho sagootin ah ku tagay xarunta Wasaaradda Arrimaha Dibadda iyo Iskaashiga Caalamiga ah ee Soomaaliya, halkaas oo uu ku qaabilay Wasiirka Arrimaha Dibadda, Mudane Cabdisalaan Cabdi Cali (Dhaay). Labada mas’uul ayaa yeeshay kulan laba geesood ah oo looga hadlay xiriirka Soomaaliya iyo Itoobiya.
Kulanka ayaa si gaar ah diiradda loogu saaray xaaladda xiriirka labada dal, iskaashiga dhinacyada kala duwan iyo muhiimadda ay leedahay sii xoojinta xiriirka derisnimo ee Soomaaliya iyo Itoobiya.
Labada dhinac ayaa sidoo kale ka wada hadlay iskaashiga dhinacyada diblomaasiyadda, amniga, dhaqaalaha iyo arrimaha gobolka, iyagoo carrabka ku adkeeyay muhiimadda ay leedahay in la sii xoojiyo wada-shaqeynta labada dal, gaar ahaan arrimaha la xiriira nabadda iyo xasilloonida Geeska Afrika.
Wasiir Cabdisalaan Cabdi Cali ayaa Danjire Suleymaan uga mahadceliyay dadaalladii uu muddadii uu xilka hayay ku bixiyay horumarinta xiriirka Soomaaliya iyo Itoobiya, isagoo xusay kaalinta uu ka qaatay fududeynta wada-shaqeynta iyo isfahamka labada dowladood.
Wasiirka ayaa sidoo kale tilmaamay in xiriirka Soomaaliya iyo Itoobiya uu yahay mid muhiim u ah danaha labada shacab iyo xasilloonida gobolka, iyadoo loo baahan yahay in la sii xoojiyo wada-hadalka iyo iskaashiga dhinacyada ay labada dal danaha wadaagaan.
Dhankiisa, Danjire Suleymaan Dedefo Woshe ayaa uga mahadceliyay Dowladda Soomaaliya soo dhaweynta iyo wada-shaqeynta uu helay muddadii uu dalka ka howlgallayay.
Danjiraha ayaa sheegay inuu muhiimad gaar ah siinayo sii ambaqaadidda xiriirka iyo iskaashiga u dhexeeya Soomaaliya iyo Itoobiya, isagoo adkeeyay baahida loo qabo in labada dal ay sii xoojiyaan xiriirkooda ku saleysan derisnimo iyo danaha labada shacab.
Kulanka ayaa ku soo dhammaaday is-afgarad ku saabsan muhiimadda ay leedahay in la sii joogteeyo xiriirka diblomaasiyadeed iyo wada-shaqeynta Soomaaliya iyo Itoobiya, gaar ahaan dhinacyada amniga, dhaqaalaha, horumarinta iyo xasilloonida gobolka.
Ugu dambeyn, Wasiir Cabdisalaan Cabdi Cali ayaa Danjire Suleymaan Dedefo Woshe u rajeeyay guul, caafimaad iyo horumar uu ka gaaro waajibaadka diblomaasiyadeed ee loo igmado mustaqbalka, isagoo uga mahadceliyay adeeggiisii iyo dadaalladii uu ku bixiyay xoojinta xiriirka labada dal.
