Madaxweynaha Mareykanka Donald Trump ayaa mar kale baraha bulshada ku daabacay khariidad muujinaysa Marinka Hormuz, iyadoo magaca marinka lagu beddelay “Trump Strait”, oo macnaheedu yahay “Marinka Trump”.
Daabacaadda khariidadda ayaa kusoo beegantay xilli Iran ay sheegtay inay Washington u gudbisay, iyada oo loo sii marayo Qatar, qorshe toddoba maalmood ah oo lagu doonayo in dib loogu furo Marinka Hormuz, isla markaana dib loo bilaabo wada-hadallada lagu soo afjarayo colaadda.
Sida ay sheegtay Iran, qorshuhu wuxuu dhigayaa in haddii Mareykanku aqbalo shuruudaha Tehran, Marinka Hormuz dib loo furi karo muddo toddoba maalmood gudahood ah, iyadoo sidoo kale dib loo bilaabayo wada-hadallada ku saabsan barnaamijka nukliyeerka Iran.
Warbixinnada ku saabsan qorshaha ayaa sheegaya in Tehran ay dalbaneyso in Mareykanku joojiyo xannibaadda maraakiibta iyo dekedaha Iran, fududeeyo cunaqabateynta la xiriirta dhoofinta shidaalka, isla markaana la helo hannaan lagu joojiyo colaadda.
Qatar ayaa door dhexdhexaadin ah ka qaadanaysa gudbinta farriimaha u dhexeeya labada dhinac, iyadoo wada-hadallada arrintan ay kusoo beegmeen shirarka Golaha Guud ee Qaramada Midoobay ee ka socda New York.
Dhanka kale, The Wall Street Journal ayaa werisay, iyadoo soo xiganaysa saraakiil Mareykan ah, in Madaxweyne Donald Trump uu diiday qorshaha toddobada maalmood ah ee Iran.
Warbixintu waxay intaas ku dartay in Trump uu kaaliyayaashiisa u sheegay inuu filayo in Mareykanku dib u bilaabo duqeymaha Iran kadib doorashada xilliga dhexe ee Mareykanka ee bisha November. Reuters ayaa sidoo kale soo tebiyay warbixinta Wall Street Journal, iyadoo xustay in xogtu ku saleysan tahay saraakiil aan magacyadooda la shaacin.
Si kastaba, warbixintan waxay ku saleysan tahay ilo Mareykan ah oo aan la magacaabin, halka Iran ay weli sheegtay inay dooneyso in qorshaha wada-hadalka la sii ambaqaado.
Trump ayaa horey u isticmaalay magaca “Trump Strait” isagoo ka hadlayay Marinka Hormuz, oo ah marin-biyood istiraatiiji ah oo muhiim u ah isu-socodka maraakiibta iyo ganacsiga tamarta caalamka.
Magaca cusub ee Trump uu khariidadda ku qoray ayaa kusoo beegmaya xilli mustaqbalka Marinka Hormuz uu noqday mid ka mid ah qodobada ugu waaweyn ee ku jira wada-hadallada Mareykanka iyo Iran.
Xaaladda ayaa weli ah mid isbedbeddeleysa, iyadoo Tehran ay soo bandhigtay qorshe dib loogu furo marinka toddoba maalmood gudahood, halka Washington, sida ay werisay Wall Street Journal, aysan aqbalin qorshahaas.
