Madaxweynaha Jamhuuriyadda Federaalka Soomaaliya, Xasan Sheekh Maxamuud iyo wafdi uu hoggaaminayo ayaa gaaray magaalada New York, halkaas oo uu kaga qaybgalayo Kalfadhiga 81-aad ee Golaha Guud ee Qaramada Midoobay.
Booqashada Madaxweynaha ayaa ku soo beegmaysa xilli Madaxweynaha Somaliland, Cabdiraxmaan Maxamed Cabdullaahi Cirro, uu toddobaadyadii lasoo dhaafay ku sugnaa Mareykanka, isagoo kulamo iyo olole diblomaasiyadeed ka waday Washington.
Xasan Sheekh ayaa New York u tegaya ajandaha Qaramada Midoobay, iyadoo doodda guud ee Golaha Guud ay bilaabanayso 22-ka Sebtembar, ayna soconayso ilaa 28-ka Sebtembar.
Dhanka kale, Cirro ayaa waqti hore u galay Mareykanka, waxaana booqashadiisa lagu daray kulamo uu la yeeshay xubno ka tirsan Congress-ka iyo dhinacyo kale oo Mareykan ah, iyadoo ajandayaasha safarkiisa lagu sheegay inay ka mid yihiin arrimaha amniga, dhaqaalaha, maalgashiga iyo aqoonsiga Somaliland.
Sida qorshayaasha safarrada labada dhinac hadda muuqdaan, Madaxweynaha Soomaaliya wuxuu New York u joogayaa inta badan hawlaha Kalfadhiga Qaramada Midoobay, halka Cirro uu Mareykanka ku qaatay muddo dheer oo ka baxsan jadwalka shirka Qaramada Midoobay. Tani waxay ka dhigan tahay in Cirro uu Mareykanka sii joogi karo xilli Xasan Sheekh uu dhammaadka hawlaha Qaramada Midoobay dalka ka ambabaxayo.
