Aqalka Cad ee Mareykanka ayaa bilaabay kanaal warbaahineed oo loogu magac daray “TRUMP TV: The Essentials Station”, kaas oo si toos ah looga daawan karo internetka, xilli maamulka Madaxweyne Donald Trump uu xayiraad ku soo rogay qaar ka mid ah warbaahinta waaweyn ee dalka.
Kanaalka cusub ayaa baahinaya muuqaallo, khudbado, warar iyo dhacdooyin la xiriira maamulka Trump, iyadoo Aqalka Cad uu si toos ah u gudbinayo qaar ka mid ah waxyaabaha uu rabo in shacabka ay daawadaan. Warbaahinta ayaa ku tilmaantay tallaabadan isku day lagu xoojinayo warbaahinta tooska ah ee Aqalka Cad.
Madaxweyne Donald Trump ayaa 18-kii Sebtembar ku dhawaaqay in CNN, MS NOW iyo Politico laga mamnuucayo gudaha Aqalka Cad, isagoo warbaahintan ku eedeeyay inay faafiyaan waxa uu ku tilmaamay “warar been abuur ah.” Maalintii xigtay, wariyeyaasha saddexda hay’adood ayaa laga hor istaagay gelitaanka Aqalka Cad, waxaana qaar laga xannibay aqoonsiyadii ay ku geli jireen xarunta.
Saddexda warbaahin ayaa diiday eedeymaha, waxayna sheegeen inay sii wadi doonaan tebinta hawlaha madaxweynaha, iyadoo sidoo kale ay qaadeen tallaabo sharci ah oo ay ku doonayaan inay ku difaacaan xuquuqdooda saxaafadeed.
Xiisadda ayaa sii xoogeysatay kadib markii shabakado ay ka mid yihiin ABC, CBS, NBC iyo Fox News ay hakiyeen nidaamkii wadajirka ahaa ee muuqaalka laga siin jiray dhacdooyinka madaxweynaha, kaas oo caadi ahaan warbaahinta kale u suuragelin jiray inay helaan muuqaalka dhacdooyinka Aqalka Cad. Tallaabadan ayaa timid kadib markii CNN laga saaray nidaamkaas.
Dhanka kale, maamulka Trump ayaa bilaabay inuu si weyn u adeegsado kanaalkiisa cusub si uu shacabka ugu gudbiyo muuqaallada iyo fariimaha Aqalka Cad, taasoo meesha ka saareysa ku-tiirsanaanta qaar ka mid ah nidaamyadii hore ee warbaahinta madaxa-bannaan ay ku heli jireen muuqaalka dhacdooyinka madaxweynaha.
Arrintan ayaa dhalisay dood xooggan oo ka dhex taagan Mareykanka oo ku saabsan xiriirka Aqalka Cad iyo warbaahinta, helitaanka saxaafaddu u leedahay xarunta madaxtooyada iyo xuduudaha awoodda dowladda marka ay timaaddo warbaahinta iyo Dastuurka Mareykanka. Saddexda warbaahin ee la mamnuucay waxay dacwaddooda ku saleeyeen ilaalinta xuquuqda saxaafadda ee ku xusan Wax-ka-beddelka Koowaad ee Dastuurka Mareykanka.
