Midowga Golaha Culimada Soomaaliyeed ayaa soo dhaweeyay, isla markaana bogaadiyay Maamulka Gobolka Banaadir qorshaha uu ku taageerayo dib-u-dejinta muwaadiniinta ay saameeyeen qorshaha dib-u-habeynta Obasiibooyinka Muqdisho.
Culimada ayaa si gaar ah u ammaanay qorshaha maamulka ee ku aaddan qoondada dhulka loogu talagalay dib-u-dejinta qoysaska ay saameeyeen howlaha dib-u-habeynta iyo horumarinta xaafadaha isku-raranka ah ee caasimadda.
Midowga Golaha Culimada Soomaaliyeed ayaa tilmaamay in tallaabooyinka lagu ilaalinayo xuquuqda iyo danaha muwaadiniinta ay muhiim u yihiin horumarinta magaalada, gaar ahaan marka la fulinayo mashaariicda lagu hagaajinayo bilicda, kaabeyaasha iyo adeegyada bulshada.
Sidoo kale, bogaadinta culimada ayaa muujinaysa muhiimadda ay leedahay in qorshayaasha horumarineed ee Muqdisho ay barbar socdaan daryeelka bulshada iyo dib-u-dejinta qoysaska ay saameeyeen mashaariicda dowladda.
Qorshaha dib-u-dejinta ayaa qeyb ka ah dadaallada lagu doonayo in xal waara loogu helo qoysaska ay saameeyeen howlaha dib-u-habeynta Obasiibooyinka, iyadoo la abuurayo deegaanno cusub oo ay muwaadiniintu ka heli karaan fursado nololeed iyo adeegyo aasaasi ah.
Midowga Golaha Culimada Soomaaliyeed ayaa ugu dambeyn muujiyay taageerada uu u hayo dadaallada lagu horumarinayo caasimadda, iyadoo la dhowrayo xuquuqda, karaamada iyo danta shacabka.
