Waxaa dalka Jarmalka ku geeriyooday, sida ay sheegayaan wararka soo baxaya, Alle ha u naxariistee Wariye Maxamed Aweys Muudey, oo si weyn loogu yaqaanay magaca “Boqorka Bartamaha.”
Wararka hordhaca ah ayaa sheegaya in marxuumka uu u geeriyooday dhaawac ka dhashay mindi, kaas oo la sheegay in loo geystay maalintii shalay. Faahfaahinta rasmiga ah ee dhacdada, cidda ka dambeysay iyo sababta keentay weerarka ayaa weli u baahan xaqiijin rasmi ah.
Maxamed Aweys Muudey wuxuu ahaa wariye muddo dheer ka soo shaqeynayay saxaafadda Soomaaliyeed, waxaana magaciisa si gaar ah loogu yaqaanay magaca “Boqorka Bartamaha.” Warbaahinta Soomaaliya ayaa horay uga qortay marxalado kala duwan oo noloshiisa iyo shaqadiisa ah, waxaana la xaqiijiyay in sannadkii 2017 laga sii daayay xabsi ku yaallay Itoobiya, kaddib muddo uu ku xirnaa dalkaas.
Geerida Wariye Maxamed Aweys Muudey ayaa ku soo beegmaysa xilli uu ku sugnaa dalka Jarmalka, waxaana baraha bulshada iyo bulshada Soomaaliyeed dhexdeeda laga dareemayaa murugada geerida marxuumka.
Maxamed Aweys Muudey wuxuu ka mid ahaa wajiyadii muddo dheer laga yaqaanay saxaafadda Soomaaliyeed, gaar ahaan warbaahinta iyo tebinta arrimaha bulshada iyo siyaasadda.
Geerida marxuumka waxaa ka tacsiyeeynaya bahda warbaahinta, eheladiisa, asxaabtiisa iyo guud ahaan bulshada Soomaaliyeed.
Alle ha u naxariisto Wariye Maxamed Aweys Muudey “Boqorka Bartamaha”, Janadii Firdowsana haka waraabiyo. Ehelkii, qaraabadii, asxaabtii iyo dhammaan ummadda Soomaaliyeedna Samir iyo iimaan haka siiyo. Aamiin.
