Ciidamada ammaanka Puntland ayaa maanta waqooyiga magaalada Gaalkacyo ee gobolka Mudug ku qabtay laba gaari oo nooca BG-ga ah, kuwaas oo la sheegay inay sidayeen ciidamo laga qoray koonfurta gobolka Mudug, sida ay sheegeen ilo amni iyo warbaahin maxalli ah.
Wararka ayaa sheegaya in ciidamadan ay kasoo gudbeen dhanka Galmudug, iyagoo kusii jeeday Xarunta Tababarka Xananbuure ee gobolka Galgaduud, halkaas oo ay ku biiri lahaayeen ama tababar uga sii gudbi lahaayeen. Labada gaari ayaa lagu qabtay waqooyiga Gaalkacyo ka hor inta aysan gaarin halka ay u socdeen.
Sida ay sheegeen ilo amni, labada gaari waxaa midkiiba saarnaa ku dhawaad 50 askari, halka warbaahin kale ay sheegtay in tirada guud ay ka badan tahay 120 qof. Tirada saxda ah weli si rasmi ah looma xaqiijin.
Muuqaallo iyo sawirro lagu baahiyay baraha bulshada ayaa muujinaya ciidamo saaran gaadiidka oo ay ciidamada ammaanka Puntland joojinayaan. Puntland weli si rasmi ah ugama hadlin faahfaahinta dhacdadan, halka Dowladda Federaalka Soomaaliya aysan sidoo kale soo saarin war rasmi ah oo ku saabsan ciidamada iyo gaadiidka la sheegay in la qabtay.
Dhacdadan ayaa kusoo beegmaysa xilli xiisadda siyaasadeed iyo tan amni ee u dhexeysa Puntland iyo Dowladda Federaalka Soomaaliya ay sare u kacday, gaar ahaan arrimaha la xiriira ciidamada iyo maamulidda xarumaha amniga ee Puntland.
Bishii Agoosto, dagaallo ayaa ka dhacay waqooyiga Gaalkacyo, halkaas oo ciidamada Puntland ay la wareegeen xero ay ku sugnaayeen ciidamo xiriir la lahaa Dowladda Federaalka. Puntland waxay xilligaas ku tilmaantay howlgalladaas kuwo amni, halka warbixinno kale ay sheegeen inay qeyb ka ahaayeen khilaafka u dhexeeya maamulka Puntland iyo dowladda dhexe.
Ilaa hadda ma jiro war rasmi ah oo si madax-bannaan u xaqiijinaya sababta ciidamada la qabtay ay u marayeen waqooyiga Gaalkacyo, tirada saxda ah ee askarta ama xaaladdooda hadda.
