Muqdisho – Wasaaradda Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya ayaa si adag u cambaareysay weerar lagu qaaday xarun koronto oo bixisa adeegga korontada ee Masjidka Nabiga (NNKH) ee magaalada Madiinah, Boqortooyada Sacuudi Carabiya.
Wasaaradda ayaa sheegtay in weerarka lagu beegsaday kaabayaal rayid ah oo u adeegaya mid ka mid ah goobaha ugu barakeysan Islaamka uu yahay fal ay Soomaaliya u aragto mid meel ka dhac ku ah karaamada iyo xurmada Goobaha Barakeysan.
Sida lagu sheegay bayaanka Wasaaradda Arrimaha Dibadda, weerarka ayaa sidoo kale loo arko xadgudub ka dhan ah sharciga caalamiga ah iyo madaxbannaanida Boqortooyada Sacuudi Carabiya.
Jamhuuriyadda Federaalka Soomaaliya ayaa sheegtay inay si buuxda garab ugu taagan tahay dowladda iyo shacabka Boqortooyada Sacuudi Carabiya, iyadoo muujisay taageerada ay u hayso dadaallada Riyadh ay ku ilaalinayso madaxbannaanideeda iyo amnigeeda.
Wasaaraddu waxay sidoo kale tilmaantay muhiimadda ay leedahay ilaalinta badbaadada muwaadiniinta, dadka deggan Sacuudi Carabiya iyo malaayiinta Muslimiinta ah ee sannad kasta booqda goobaha barakeysan ee Madiinah iyo Maka.
Soomaaliya, oo xubin ka ah Ururka Iskaashiga Islaamka (OIC), ayaa sheegtay inay si cad uga soo horjeeddo dhammaan falalka khatarta ku ah xasilloonida gobolka iyo amniga goobaha barakeysan.
Wasaaradda Arrimaha Dibadda ayaa ugu baaqday in si dhab ah loo baaro weerarka, isla markaana lala xisaabtamo cid kasta oo lagu helo inay ka dambeysay, iyadoo la ilaalinayo sharciga caalamiga ah iyo madaxbannaanida Boqortooyada Sacuudi Carabiya.
Bayaanka Soomaaliya ayaa kusoo beegmaya xilli ay sii kordhayaan walaacyada laga qabo weerarrada lagu beegsanayo kaabayaasha rayidka ah iyo goobaha muhiimka u ah bulshada, kuwaas oo haddii ay sii socdaan saameyn ku yeelan kara amniga iyo xasilloonida gobolka.
