Kooxo ka tirsan bulshada rayidka ah ee Koonfurta Kuuriya ayaa maanta dibadbax ka dhigay meel u dhow safaaradda Mareykanka ee magaalada Seoul, iyagoo muujiyay sida ay uga soo horjeedaan in dalkooda uu ku lug yeesho dagaalka ka socda Bariga Dhexe.
Dibadbaxayaasha ayaa si gaar ah uga hadlay cadaadiska Washington ee ku aaddan doorka Koonfurta Kuuriya ee marin-biyoodka Hormuz, oo ah waddo muhiim u ah isu-socodka maraakiibta iyo gaadiidka shidaalka. Wararka maanta laga helayo Seoul ayaa xaqiijinaya in kooxaha bulshada rayidka ahi ay isu soo baxa ku muujiyeen diidmada faragelinta militari ee dagaalka.
Madaxweynaha Koonfurta Kuuriya, Lee Jae-myung, ayaa shalay sheegay in dalkiisu uusan ciidamo u diri doonin qaab keeni kara in Koonfurta Kuuriya ay si toos ah uga qeyb qaadato dagaalka.
“Ma jiri doonto dirista ciidamo horseedi karta ka-qaybgal ama faragelin dagaal,” ayuu Lee ku sheegay shir jaraa’id oo uu qabtay
Si kastaba, dowladda Seoul waxay sheegtay inay weli eegayso siyaabo ay uga qeyb qaadan karto ilaalinta maraakiibta, muwaadiniinteeda iyo xorriyadda isu-socodka ee marin-biyoodka Hormuz, iyadoo aysan doonayn in tallaabooyinkaas ay u beddelmaan ka-qaybgal dagaal.
Mowqifka dowladda Koonfurta Kuuriya ayaa imaanaya xilli Mareykanka uu doonayo in xulafadiisa ay door ka qaataan amniga marin-biyoodka Hormuz, halka Seoul ay isku dayeyso inay kala saarto ilaalinta danaha ganacsi iyo muwaadiniinta iyo ka-qaybgalka tooska ah ee dagaalka.
Dhanka kale, xafiiska madaxweynaha Koonfurta Kuuriya ayaa maanta caddeeyay in hadalka Lee uusan ahayn diidmo guud oo ku saabsan iskaashiga Mareykanka, balse Seoul ay sii wadeyso qiimeynta fursadaha wax-ku-biirinta, iyadoo shardi laga dhigayo inaan dalku ku lug yeelan dagaal ama hawlgallo dagaal.
